ASOCEX
Datozen egunetan, Kontuen Ganberak hiru txosten karrikaratuko ditu: ostegunean, Egues Ibarreko udalari buruzkoa; ostiralean, Baldizarbeko Mankomunitateari buruzkoa eta heldu den astean Unibertsitate Publikoaz eginikoa.
Ismael Sánchez Bella, Nafarroako Unibertsitateko lehen errektorea, Kontuen Ganberaren egoitzan izan da bisitan. Aipagarria da Sanchez Bella berak negoziatu zuela orduko Diputazioarekin unibertsitatea Kontuen Ganberan kokatzea. Hala izan zen: 48 ikasle hasi ziren Zuzenbidean. Ondoren, Medikuntzak ere kurtso bat eman zuen gure egoitzan eta, azkenik, Kazetaritzaren Institututoa hasi zen. Nafarroako Unibertsitateak, guztira, hamar urte egin zituen gure egoitzan, 1962ra arte.
Kontuen Ganberako presidente Helio Robleda Parlamentuko Mahai eta Eledunen Batzordearen aitzinean agertu da, heldu den urteko fiskalizazio planaren berri emateko. 2014. urterako, 31 lan aurreikusi dira. Urtero egiten direnez gain, Osasunbidearen azpiegituren kudeaketa aztertuko da; Sodena enpresa publikoa; Gobernuak Ikerketa, Garapen eta Berrikuntzarako ematen dituen diru-laguntzak fiskalizatuko dira, bai eta sindikatu eta enpresarien elkarteek jasotakoak.
Iruñeko Eskolapioen ikastetxeko bi talde gurean izan dira gaur, Kontuen Ganberaren egoitza bisitatzen. Erakundearen berri jaso ondotik, lehen solairua ikusi dute eta, amaitzeko, Kobntuen Ganberari buruzko bideoa ikusi dute. Irudian, gaztetxoak bideoa ikusi eta gero.
Kontu publikoen finkapen sistema berria aztertzen ari da gaur Kontuen Ganberaren egoitzan. Vicente Cóndor kontabilitate katedraduna mintegi bat ematen ari da, aipaturiko finkapena nola egin behar den azaltzeko. Kontuan hartzekoa da aurtengo uztailean urteko kontuak emateko arautegi berria onartu zela. Gaurko mintegiaren helburu nagusia da arau horiek aztertzea. Kontuen Ganberako teknikariak ez ezik, Nafarroako beste administraziotako ordezkariak ere parte hartzen ari dira mintegian.
Helio Robleda Kontuen Ganberako presidenteak gaur zortzi, hilak 26, aurkeztuko du iazko kontu orokorren txostena. Pasan den astean argitaraturiko txostenak nafar ogasunaren egoera aztertzen du, beti ere ikuspegi orokorra eskainiz. Gobernua eta gainerako erakunde publikoen kontuez gain, enpresa publikoenak ere aztertu dira. Ekonomia Batzordean egitekoa den agerraldia goizeko 10etan hasiko da.
Kontuen Ganberako presidentea Parlamentuko Hezkuntza Batzordearen aitzinean agertuko da bihar, Nafarroako Unibertistateaz berriki eginiko txostena azaltzeko. Txostenak Unibertsitatearen azken hiru urteotako bilakaera aztertzen du, eta bereziki 2010ekoan eginiko gomendioa zenbateraino bete diren. Agerraldia goizeko 10etan hasiko da.
Iruñeko Cuatrovientos Institutuko Administrazio eta Finantzak goi zizloko ikasle talde bat bisitan izan dugu gure egoitzan. Etxea ikusteaz gain, Kontuen Ganberaren historia eta gaur egungo egoeraren berri jaso dute. Azkenik, Ignacio Cabeza auditorearen azalpenak jaso dituzte.
Nafarroako Kontuen Ganbera Twitterren dago. Hemendik aurrera, gizarte-sarearen erabiltzaileek erakundearen berri jasoko dute, @camaradecomptos helbidean sartuta. Bertan, hurrengo egunetan argitaratu beharreko txostenak iragarriko dira, behin argitaratu eta gero laburpenak helaraziko dira eta erakundeari loturiko bestelako informazioa ere eskainiko da.
Barañaingo Liburutegiko irakurle talde bat gure egoitzara etorri zen pasa den larunbatean. Guztira hogeita hamar bat lagun ziren, emakumezkoak gehienak, horrelakoetan ohikoa izaten den bezala. Aurretik Kontuen Ganberaren egoitzari buruzko liburua irakurri eta lau egun lehenago argitalpenaren aurkezpena ere egina zuten liburutegian berean, Fermin Erbiti egilea bertan zela. Larunbatean Ansoleaga karrikako etxea ikusteko parada izan zuten. Barneko patioa eta lehen solairua ikusteaz gain, erakundearen berri eman zitzaien.