ASOCEX
Iñaki Gabilondoren hitzaldirako tokirik ez dago. Sarrera librea zen, aurretik izena emanda. Leku guztiak beteta daude. Hitzaldia arratsaldeko 7etan hasiko da, Iruñeko Baluarteko Camara aretoan.
Jose Luis Ezquerro Kontuen Ganberako legelariak Auditoría Publica aldizkariaren saria jaso zuen atzo, Oviedon eginiko ekitaldi batean. Nafarrak Asturiaseko Kontu Epaitegiko presidente Avelino Viejoren eskutik jaso zuen saria. Ezquerrok kontrol instituzioen eta Parlamentuko ikerketa batzordeen arteko harremanak aztertu zituen artikuluan, Ultzamako biogas plantari buruzko batzordean gertaturikoa oinarritzat harturik.
Iñaki Gabilondok liluratu egin zituen atzo Baluarteko Camara aretoa bete zituzten entzuleak. Kontuen Ganberako komunikazio arduradun Fermin Erbitirekin eginiko solasaldian, donostiarrak Iruñeko oroitzapenak, pil-pilean dauden gaiak eta etorkizuna izan zituen hizpide. Gogoeta interesgarriz beteriko bi orduko solasaldia izan zen. Ondoren, Asun Olaetxea Ganberako lehendakariak kazetaritzaren eta auditoriaren arteko loturak nabarmendu zituen. Hasieran zein amaieran, jendeak txalo zaparrada handia eskaini zion itzal handiko kazetariari.
Elizondoko Lanbide Eskolako ikasle talde bat bisitan etorri da gaur Kontuen Ganberara. Ikasleak goi mailako Administrazioa eta Kudeaketa ikasten ari dira eta, beraz, bazuten auditoretza eta kontabilitatearen berririk. Gure egoitza erakutsi ondoren, Aitor Navarro teknikariak hitzaldi bat eman die auditoretza-lanaren nondik-norakoez. Kontuen Ganberatik Iruñeko Udaletxera ziren joatekoak. Aurretik, ordea, ohi bezala talde argazkia egin dugu barneko patioan. Hortxe dituzue ikasle eta irakasle baztandarrak. Heldu den urtera arte!!
Asun Olaetxea, Kontuen Ganberako lehendakaria, Parlamentuko Giza Eskubideen Batzordearen aitzinean agertuko da, Salestarren hirigintza operazioari buruzko txostena azaltzeko. Agerraldia otsailaren 26an izanen da, arratsaldeko 3:30ean hasita.
Gemma Angelica Sanchez Lermak Auditoría Publica saria lortu du. Estatuko auzitegi autonomikoek argitaratzen duten aldizkariak, modu horretan, iazko aleetan idatzitako artikulu hoberenaren saria eman dio.
Kontuen Ganberako letraduak udal eta gainerako administrazioek zeharkako kudeaketatik zuzeneko kudeaketara bueltatzen dituzten zerbitzuei buruzko kontrola aztertu du. Alegia, prozesu horiek nola ikuskatu, zer pausu eman behar diren kontrola ahalik eta egokiena izan dadin.
Iruñeko Maria Inmaculada LHko Ikastetxeko ikasle talde bat gurean izan da bisitan. Administrazio Kudeaketako ikasleak Maite Yarnoz irakaslearekin etorri dira. Gure etxeko bi leku nagusiak ikusi dituzte: barneko patioa eta lehenbiziko solairua. Ondoren, Kontuen Ganberaren bideoa ikusi dute. Azkenik, talde-argazkia egin diegu patioan, bisitaren oroigarri.
Beteluko Araxes Eskolako 5. eta 6. mailetako ikasleak bisitan etorri dira gaur Kontuen Ganberara. Araitz, Betelu, Errazkin eta Lezaetako neska-mutikoei etxea erakutsi ondoren, Kontuen Ganberaren lanaz ere hitz egin diegu. Begi bistakoa da ikasle txintxoak direla: aurretik prestaturiko galderak egin dizkigute, bat etxeaz eta baita etxe honetan egiten den lanaz ere. Bisita amaitu aurretik, argazkia egin diegu patioan, irakasle eta gure lehendakariarekin.
Kontuen Ganberako lehendakari Asun Olaetxea Parlamentuko Landa Garapena, Toki Administrazio eta Ingurugiro batzordearen aitzinean agertu da gaur, Lizarrako Oncineda-ri buruzko txostena azaltzeko. Otsailean argitaraturiko txostenak Lizarrako Udalak Oncineda-ko jabeekin eginiko hirigintza hitzarmenak aztertu zituen. Asun Olaetxeak gogoratu duenez, hitzarmenak alkateak sinatu zituen, udal gobernu batzordearen baimenik gabe. Horrez gain, hitzarmenen inguruko aholkulari, kontrol eta jarraipen lanak kanpoko enpresen esku utzi ziren.
Igor Ijurra, Iruñeko Orfeoiko zuzendaria, Kontuen Ganberako topaketetan izan dugu gonbidatu eta hizlari. Topaketen helburua da politika, ekonomia, gizarte eta kultura arloko pertsonaiak gure etxera ekartzea, gonbidatua eta ordezkatzen duen erakundea ezagutzeko eta, bide batez, hark ere gu ezagutu gaitzan. Beti bezala, erakundeko Komunikazio arduradunak elkarrizketa egin dio etxarriarrari eta, ondoren, Kontuen Ganberako jendeak galderak egiteko aukera izan du.