ASOCEX
Juan Manuel Fernande epailea, Botere Judizialaren Kontseiluko kide eta Nafarroako Justizia Epaitegi Goreneko presidente ohia gure egoitzan izan dugu, Kontuen Ganberako topaketetan hizlari. Haren ibilbideaz hiz egin digu, eta justiziaren egoera eta erronkak ere hizpide izan ditu.
Kontuen Ganberako lehendakari Asun Olaetxea Parlamentuan agertu da, azken hilabeteotan argitaratu dituen bi txosten aurkezteko: 9.000 biztanletik gorako udalen kontratazioa eta Bera, Viana, Altsasu eta Baztango Udalek herriko ikastolari emaniko diru-ekarpenei buruzkoa.
Estatuko kontu auzitegietako ordezkariak Iruñean elkartu dira gaur, guztien arteko harremanak sendotzeko eta elkar lana bultzatzeko. Bileran Kontuen Ganberako lehendakari Asun Olaetxeak parte hartu du, Estatuko kontu auzitegietako beste ordezkariekin batera. Bileran unibertsitate arloko auditoretza-lana egitea hitzartu dute. Bestalde, instituzio bakoitzak datorren urteko planaren berri eman du.
Iñaki Gabilondok liluratu egin zituen atzo Baluarteko Camara aretoa bete zituzten entzuleak. Kontuen Ganberako komunikazio arduradun Fermin Erbitirekin eginiko solasaldian, donostiarrak Iruñeko oroitzapenak, pil-pilean dauden gaiak eta etorkizuna izan zituen hizpide. Gogoeta interesgarriz beteriko bi orduko solasaldia izan zen. Ondoren, Asun Olaetxea Ganberako lehendakariak kazetaritzaren eta auditoriaren arteko loturak nabarmendu zituen. Hasieran zein amaieran, jendeak txalo zaparrada handia eskaini zion itzal handiko kazetariari.
Iñaki Gabilondoren hitzaldirako tokirik ez dago. Sarrera librea zen, aurretik izena emanda. Leku guztiak beteta daude. Hitzaldia arratsaldeko 7etan hasiko da, Iruñeko Baluarteko Camara aretoan.
Nafarroako Kontuen Ganberak "Iñaki Gabilondorekin solasean" ekimena antolatuko du irailaren 20rako, Iruñeko Baluarten. Donostiarrak Kontuen Ganberaren etxean ikasi zuen, bertan baitzegoen Unibertsitate Pribatuaren egoitza. Mikrofonoaren aitzinean izan zuen lehenbiziko esperientzia ere Kontuen Ganbarari dago lotua: ikasleek praktiketan egiten zuten "Cámara de Comptos" irratsaioa, hain zuzen. Hori dena, haren ibilbide profesionala eta Gabilondo itzal handiko pertsonaia dela kontuan hartuz, gure egoitza bisitatzera eta solasaldi batean parte hartzera gonbidatu dugu.
Jose Luis Ezquerro Kontuen Ganberako legelariak Auditoría Publica aldizkariaren saria jaso zuen atzo, Oviedon eginiko ekitaldi batean. Nafarrak Asturiaseko Kontu Epaitegiko presidente Avelino Viejoren eskutik jaso zuen saria. Ezquerrok kontrol instituzioen eta Parlamentuko ikerketa batzordeen arteko harremanak aztertu zituen artikuluan, Ultzamako biogas plantari buruzko batzordean gertaturikoa oinarritzat harturik.
Nafarroako Kontuen Ganberako funtzionarioek datuen babeserako arautegiari buruzko ikastaroa jaso dute, Javier Peña Alonsoren eskutik. Peña Burgoseko Diputazoiko teknologia berrien sailburua da. Kontuan hartzekoa da aipaturiko arautegia martxoaren 25an indarrean sartuko dela eta, bera, administrazio publiko guztiek bete egin beharko dutela.
Kontuen Ganberako lehendakari Asun Olaetxea Parlamentuko Osasun Batzordearen aitzinean agertu da gaur, Osasunbideko behin behineko langileriaren kontratazioari buruzko txostena azaltzeko. Olaetxeak azaldu duenez, 2016an eta 2017an 43.000 kontratu egin ziren. Azken urteotan kontratuen bataz besteko iraupena handitu bada ere, behin behinekotasun maila %51raino heldu da. Horren guztiaren arrazoi nagusia da Estatuak, azken urteotan, enplegu eskaintzak egiteko murrizketak agindu dituela.
Kontuen Ganberako lehendakaria Parlamentuko Osasun Batzordearen aitzinean agertuko da bihar, maiatzak 4, Osasunbideko langileriaren kontratazioari buruzko txostenaren berri emateko. Berriki argitaraturiko txostenak 2016 eta 2017ko langileriaren behin behineko kontratazioa aztertu du. Agerraldia goizeko 9:15ean hasiko da.