Angel Gonzalez Malaxetxebarriak hizlari izanen dugu Kontuen Ganberan datorren asteartean, otsailak 14. Malaxetxebarria ikuskaritzan eta diru publikoaren kudeaketan aditua da, ibilbide luzea eginikoa. Price Waterhouseko Ikuskaritzako kudeatzailea izan ondoren, Venezuelan lan egin zuen, Nekazaritza eta Ogasun ministeritzetan. Ondoren, Petrolio Partzuergoko auditore burua izan zen. Azkenik, Munduko Bankuan aritu zen,proiektuen ikuskaritza zuzenduz. Orain auditore eta kudeatzaileen prestakuntza lanetan dabil, hitzaldi eta ikastaroak emanez.
Kontuen Ganberako lehendakari Asun Olaetxea Parlamentuan agertuko da heldu den asteartean, urtarrilak 31, udal batzuen auditoria aurkezteko. 10.000 biztanletik gorako udalen txostenez gain, beste batzuk ere aurkeztuko ditu:Lerin, Izaba eta Ororbiako Kontzejuarena, hain zuzen. Udaletako kontu-hartzaileek aurkezturiko erreparoez ere mintzatuko da. Eta, azkenik, toki sektorearen egoerari buruzko txosten orokorra ere aurkeztuko du.
Kontuen Ganberako lehendakaria etzi, hilak 25, Parlamentura joanen da AHTko obra-lanei buruzko txostena aurkezteko. Txostenak honako gai hauek aztertzen ditu: Nafarroak obra-lanak bultzatzeko aurreratu duen zenbatekoa eta kobratzeko duena: inbertsioen plangintza zenbateraino bete den, eta Europako trenbidearen zabalerara egokitzeko hirugarren erraila hobesteko aukera. Agerraldia goizeko 9:30etan eginen da, Garapen Ekonomikoa Batzordearen aitzinean.
Nafarroako Kontuen Ganberako teknikariek nazioarteko ikuskaritza-arauei buruzko ikastaro batean parte hartu dute. kanpoko kontrol erakundeko teknikari batzuk ere Iruñera etorri dira, ikastaroan parte hartzeko asmoz. Antonio Minguillon Balentziako Kontuen Ganberako ikuskariak eman du ikastaroa. Naziaorteko arauak Estatuko kontrol erakundeak bereganatzen ari dira eta hemendik aurrera auditoreek kontuan hartu beharko dituzte. Helburua da, azken finean, kontrol erakunde guztiek gutxieneko batzuk betetzea eta nolabaiteko batasuna lortzea.
Elortzibar-Noaingo Institutuko talde bat bisitan izan da gaur Kontuen Ganberan. Barneko patioa eta lehen solairua ikusi ondoren, etxe honetan eginiko txanponen erakusketa eta bideoa ikusi dute. Ondoren, argazkia egin dugu barneko patioan.
Lizarrako Institutuko bi ikasle talde gure egoitzara etorri dira gaur bisitan, Kontuen Ganberaren berri jasotzeko. Kontuen Ganberaren historia eta egoitzarena azaldu ondoren, gaur egungo erronkak eta lan egiteko modua aipatu dizkiegu. Javier Martikorena teknikariarekin elkarrizketatzeko aukera ere izan dute, kontu tekniko zehatzagoak jasotzeko. Bisita amaitzeko, behean duzuen argazkia egin dugu etxeko patioan.
Kontuen Ganberako lehendakari Asun Olaetxea Parlamentuan agertuko da etzi, urtarrilak 11, Nafarroako Gobernuaren informatikaren kontratazio eta kudeaketa aztertzen duen txostenaren berri emateko. Txostena iazko ekainean argitaratu zen. Agerraldia Lehendakaritza, Funtzio Publikoa, Barne eta Justizia Batzordearen aitzinean eginen da, goizeko 9:30 etan hasita.
Iruñeko Maria Inmaculada Lanbide Heziketako ikastetxeko talde bat gure egoitzan izan da gaur goizean. Gazteak Administrazio eta Kudeaketaren zikloko azken kurtsokoak dira. Etxe ezagutzeaz gain, erakundearen zereginen berri jaso dute. Bisita amaitzeko, argazkia egin dugu gure egoitzako barneko patioan, irudian ikusten den bezala.
Kontuen Ganberako lehendakari Asun Olaetxea eta idazkari nagusi Luis Ordoki Parlamentuetako legelarien elkarteak antolaturiko XXIII. jardunaldietan parte hartzen ari dira. Jardunaldiak gaur hasi dira, Gasteizko Herri Kontuen Euskal Epaitegiko egoitzan eta bihar amaituko dira. Gaur goizeko lehen hitzaldia Luis Ordokirena izan da. Nafarrak azpimarratu duenez, kontu epaitegien sinesgarritasuna bermatzeko ezinbestekoa da erakundeen independentzia, profesionaltasuna eta gardentasuna. Asun Olaetxeak bihar hitz eginen du, kontu epaitegien etorkizuneko erronkez antolaturiko mahai inguruan.