Estatuko kontu epaitegietako ordezkariak Iruñean elkartu dira gaur, Kontuen Ganberaren egoitzan, diru publikoaren kontrolari loturiko gai batzuk aztertzeko. Gaurko bileran, bereziki administrazio publikoen fiskalizazioa azkartzeko proposamenez hitz egin dute. Kontuen ikuskaritza aurreratzeko modu bakarra kontuen ixtea ere azkartzea denez, horixe bultzatzen saiatuko dira. Aldi berean, udalen ikuskaritza orokortzeko neurriez mintzatu dira.
Bilera berean, presidenteeen taldeko buru berria izendatu dute: Avelino Viejo asturiarra izanen da hemendik aurrera.
Kontuen Ganberak Europari buruzko jardunaldia antolatu du. Etxeko teknikoei zuzenduriko jardunaldian bi hizlari izan dira: Mikel Irujo, Nafarroak Bruselan duen ordezkaria; eta Izaskun Goñi Politika Ekonomikoko zuzendari nagusia. Irujok Europako erronkez eta Nafarroak Europar Batasunean egin dezakeenaz mintzatu da. Izaskun Goñik Europatik datozen funtsen kudeaketa aztertu du.
Asun Olaetxea Kontuen Ganberako lehendakaria Parlamentura joanen da bihar, Nafarroako Odol eta Ehunen Bankuari buruzko txostena aurkezteko.Txostena Parlamentuak berak eskatu zuen, eta apirilean kaleratu zen. Agerraldia goizeko 9:30etan eginen da, Osasun Batzordearen aitzinean.
Kontuen Ganberako lehendakaria Parlamentuan agertuko da bihar Ultzamako minden plantari buruzko txostena aurkezteko. Agerraldia Landa Garapena, Ingurumena eta Toki Administrazioa Batzordean izanen da, goizeko 11etan hasita.
Estatuko kontu epaitegietako ordezkariak Palencian bildu dira gaur, elkarri informazioa emateko eta lanen koordinazioan areagotzeko. Kontuen Ganberaren ordezkaria Asun Olaetxea lehendakaria izan da.
Estatuko fiskal nagusiak Kontuen Ganbera bisitatu du gaur goizean, José Manuel Maza Nafarroako fiskal buru Jose Antonio Sanchez eta Kontue Epaitegiko fiskal buru Miguel Angel Torresekin etorri da. Asun Olaetxearen eskutik ezagutu dituzte etxea eta erakundearen zereginak. Ondoren, Kontu Epaitegiko fiskal buruak hitzaldi bat eman die egunotan Kontuen Ganberan bildurik dauden kontu epaitegietako legelariei.
Kontu epaitegietako hogei bat lagun bildurik daude Iruñean, Kontuen Ganberaren egoitzan, beren zereginez hausnarketa egiteko. Aztertuko dituzten kontuen artean daude hurrengoak: langileriaren kudeaketa, soldatak, epaitegietan peritu edo lekuko gisa egin beharrekoa eta txostenen eduki juridikoa.
Jardunaldiak bihar amaituko dira, Espainiako Kontu Epaitegiko fiskal buruaren hitzaldiarekin.
Irudian, kontu erakundeetako legelariak gaurko bileran.
Kontuen Ganberako lehendakariak erakunde publikoen zorraren kalifikazioari buruzko jardunaldi batean parte hartu du gaur goizean. Navarra Capital enpresak antolaturiko jardunaldian Standard&Poor´s agentziako zuzendaria mintzatu da. Olaetxeak hizlariaren aurkezpenean adierazi du zorraren kalifikazioa eragin eta ondorio garrantzitsuak dituen lana dela. Horregatik, haren ustetan, zeregin horretan ari direnek profesionaltasunez eta independentziaz jokatu behar dute.
Kontuen Ganberako lehendakaria Parlamentuan agertuko da gaur, Nafarroako erakundeen zorraren bilakaerari buruzko txostena aukezteko. Zorraren bilakaera aztertzen ari den ponentziak eskaturik egin da azterketa. Horren arabera, 2000an Nafarroako Gobernuaren zorra 2.845 milioi zen. 2015ean, berriz, 2.845 milioraino heldu zen. Enpresa publikoen eta fundazionea ere kontua hartuz, 3.322 zor publiko dago. Agerraldia eguerdiko ordu batean hasiko da.
Nafarroako Gardentasun Kontseiluak sorrera bilera egin zuen atzo, Nafarrako Jauregian, organo sortu berriaren lan ildoak zehazteko. Gardentasun Kontseilua kontrol erakunde autonomoa da, biztanleriak informazio publikoa jasotzeko duen eskubidea bermatu nahi duena. Alde horretatik, biztanleen kexak jasoko ditu, gardetnasunari loturiko lege proiektuez iritzia emanen du, gardentasun egoerari buruzko azterketak bultzatuko ditu eta, azkenik, gardentasuna zabaltzeko prestakuntza eta sentsibilizazio kanpainak eginen ditu. .