Kontuen Ganberako lehendakaria Parlamentuko Garapen Ekonomikorako Batzordearen aitzinean agertuko da heldu den asteazkenean, otsailak 24, Iberdrolaren akzioen salerosketari buruzko txostena azaltzeko. Agerraldia goizeko 9:30etan hasiko da.
Heldu den asteartean, hilak 9, Helio Robleda Parlamentuko Kultura, Kirol eta Gazteria batzordearen aitzinean agertuko da. Agerraldiaren helburua da Pablo Sarasate Fundazioaren eta Santa Zezilia elkartearen arteko harramanaz berriki eginiko txostena aurkeztea. Aipaturiko bi entitateek Nafarroako Orkestra Sinfonikoa kudeatzen dute
Nafarroako Parlamentuko Mahai eta Eledunen Batzarrak Kontuen Ganberako hurrengo lehendakaria aurkezteko bidea abiarazi du. Gaurko bileran martxoaren 4ra arteko epea finkatu du parlamentu taldeek hautagaiak aurkez ditzaten. Gogoratzekoa da Helio Robleda lehendakariak otsailaren 18an amaituko duela sei urteko agintaldia. Robledak ez du berriro kargua hartzeko hautagai izan nahi. Otsailaren 18tik, beraz, jardunean ariko da, hurrengo lehendakaria lanean hasi arte.
Tafallako Politeknikoko bi talde gure egoitzan izan dira gaur goizean, Kontuen Ganberaren berri jasotzeko asmoz. Lehen taldea Administrazio Kudeaketa ziklokoa eta bigarrena, berriz, Administrazio eta Finantza goi mailakoa. Eraikina bisitatu ondoren, kontu-ikuskari batekin elkartu dira, eguneroko lanaren berri jaso eta kontu zehatzak lantzeko. Irudian, goi mailako zikloko ikasleak, kontu-ikuskariarekin.
Iruñeko Maria Inmaculada Lanbide Heziketaren Ikastetxeko ikasle talde bat Kontuen Ganberara etorri da bisitan. Eraikinaren gune nagusiak ikusi ondoren, Kontuen Ganberaren historia eta gaur egungo zereginak azaltzen dituen bideoa ikusi dute. Bisita amaitu aurretik, patioan elkartu ditugu argazkia egiteko.
Helio Robledak gaur Parlamentuan egitekoa zuen agerraldia otsailaren 2ra atzeratu da, Parlamentuak berak eskatuta. Agerraldiaren helburua zen foru Administrazioaren eraikinetako garbiketa kontratuari buruzko txostena aztertzea. Ez da datozen egunetan izanen dugun agerraldi bakarra. Nafarroako Orkestra Sinfonikoari buruzko txostena ere aztergai izanen da Parlamentuan, otsailaren bigarren astean.
Heldu den asteartean, urtarrilak 19, Kontuen Ganberako lehendakaria Parlamentura joanen da Foru Administrazioaren bulegoetako garbiketa zerbitzuaren kontratazioaz eginiko txostena aurkeztera. Helio Robledaren agerraldia Lehendakaritza, Barne eta Justizia Batzordean eginen da, goizeko 9:30etan hasita.
Donapeako Administrazioa eta Kudeaketa zikloko bi ikasle talde gure egoitzan izan ziren atzo. Kontuen Ganberaren etxearen ezaugarrien berri jaso ondoren, erakundearen zereginak azaldu genizkien. Ondoren, Kontuen Ganberari buruzko bideoa ikusi zuten. Bisita amaitu aurretik, etxeko patioan argazkia egin genien.
Kontuen Ganberako lehendakaria Parlamentuko Mahai eta Bozeramaileen Batzordearen aitzinean agertu da 2016ko programa aurkezteko. Kontuen Ganberak 35 txosten eginen ditu 2016an, horien artean Osasunbideako laborategien bateratze-prozesua, Foru Administrazioiko langileriaren kontratazioaren bilakaera, zerbitzu informatikoen kontratazioa eta Miguel Induarain Fundazioak jasotako diru-laguntzak. Abiadura handiko trenbideak azken urteotan sorturiko gastua ere aztertuko da. Toki sektorean, ohi denez, 10.000 biztanletik gorako udal guztien fiskalizazioa eginen da.
Uxue Barkos lehendakariak "Kontuen Ganberako topaketak" izeneko ekimenean parte hartu du gaur eguerdian. Ekimenaren helburua da Nafarroako arlo ezberdinetako pertsonaiak gure egoitzara ekartzea, guk haiek ezagutzeko eta, aldi berean, haiek ere gu ezagutu gaitzaten. Hasteko, Ganberako komunikazio arduradunak elkarrizketa egin dio lehendakariari, haren ibilbide politikoa eta pil-pilean dauden gai batzuen inguruko iritzia ezagutzeko. Ondoren, funtzaionarioek ere lehendakariari galderak egin dizkiote.