Nafarroako Comptos Ganberak Audit Commissionekin antolaturiko lan-jardunaldia amaitu da. Guztira, hainbat erakundetako 50 teknikarik hartu dute parte. Audit Commissioneko ordezkariaren ondoren, Clara Muñoz, Daniel Carrasco eta Jose Luis Pablos unibertsitate-irakasleek kudeaketa-kostu eta adierazleak finkatzeko egiten ari diren lana aurkeztu dute.

Helio Robleda, Comptos Ganberako presidentea, eta Elizabeth Peers, Ingalaterrako Audit Commissioneko ordezkaria, kazetarien aitzinean agertu dira. Prentsaurrekoa bi erakundeen arteko harremanen berri emateko egin da. Izan ere, Comptos Ganberak gonbidaturik, Audito Commissioneko bi ordezkari Iruñera etorri dira, Ingalaterrako kontrol erakundeak eginiko lana azaltzeko. Audit Commission itzal handiko kontrol erakundea da, batez ere kontuen azterketa ez ezik, eraginkortasunaz ere iritzia ematen duela.

Nafarroako Comptos Ganberak aurten fiskalizatuko dituen udal guztietako idazkari eta kontu-hartzaileak erakundearen egoitzan elkartu dira gaur, egin beharreko lanaren berri jasotzeko. Halaber, Comptos Ganbera udalen kudeaketa sakonago aztertzeko martxan jarri nahi dituen adierazleen inguruko informazioa ere eman zaie. Helburua da fiskalizazio txostenenetan kontuak eta legezkotasuna ez ezik, eraginkortasuna ere aztertzea, eta horretarako adierazle komun batzuk behar dira. Oraingoz lau arlotan lan egin da: kirola, gizarte zerbitzuak, argiak eta haur eskolak.

Helio Robleda, Comptos Ganberako presidentea, Parlamentuko Ekonomia Batzordearen aitzinean agertu da gaur goizean, 2009ko kontu orokorrei buruzko txostena aurkezteko.

Robledak adierazi duenez, 2009ko gastuak 4.372 milioi izan ziren eta diru-sarrerak, berriz, 4.221 milioi. Urte amaierako zorra 1.024 milioikoa zen, aurreko urtean baino %26 gehiago. 

Comptos Ganberak kontabilitate publiko plan berriari buruzko ikastaroa antolatu du. Gaur goizean hasitako ikastaroan 50 bat lagunek hartzen dute parte, gehienak Comptos Ganberako teknikariak. Hizlariak honakoak dira: Vicente Condor, Zaragozako Unibertsitateko katedraduna, Arantza López Cascante Estatuko Administrazioko Kontu-hartzailetzako sailburua eta Isabel Brusca, Zaragozako Unibertsitateko irakaslea.

Helio Robleda, Nafarroako Comptos Ganberako presidentea, Parlamentuko herri-lan Batzordearen aitzinean agertu da gaur goizean, Gobernuak azken urteotan eginiko obra-lanei buruzko txostena azaltzeko.

Robledak azaldu duenez, obren esleipenetan, bataz beste, %12 merketu zen aurrekontua. Behin betiko kostua %5 igo zen adjudikaturiko zenbatekoarekin alderatuz. Obra eta zerbitzu osagarri eta laguntza teknikoei dagokienez, esleipen-prezioaren %7 dira, gutxi gora behera.

Fermin Erbiti, Comptos Ganberako komunikazio arduraduna, aurtengo Juan Zelaia saiakera sariaren irabazlea izan da, ex aequo Kepa Larrea basauritarrarekin. 

Irunxemearen lana "Hiru koaderno txiki" da. Bertan, hainbat gairi buruzko gogoetak bildu ditu: literatura, musika, denboraren joan-etorria, haurtzaroa, erlijioa. Saiakeraren bigarren zatian ere gogoeta testu laburrak bildu ditu, baina guztiak gai bakar baten inguruan: komunikazioa.

Luis Muñoz Garde Comptos Ganberako presidente ohiak lan arloan eginiko merituak saritzen dituen urrezko domina jaso du. Muñoz Garderekin batera beste 34 lagun saritu ditu Espainiako Gobernuak. Sariaren xedea da edozein lan edo zerbitzutan eginiko ibilbide eredugarria nabarmentzea. 

Muñoz Garde Etxalarren sortu zen 1939an. Merkataritza-ikasketak bururu ondoren, aholkulari fiskalen elkartean sartu zen eta Kontu-ikuskarien elkarteko kide ere izan zen.

Helio Robleda, Nafarroako Comptos Ganberako presidentea, Parlamentuko mahai eta bozeramaleen batzordearen aitzinean agertu da gaur goizean, datozen urteotako plan estrategikoa eta heldu den urteko fiskalizazio-planaren berri emateko.

Kontu Epaitegietako 150 auditore Iruñean elkartuko dira bihar eta etzi, diru publikoen kontrolaz eztabaidatzeko. Inaugurazio-ekitaldia INAPeko Pio Baroja aretoan eginen da, goizeko 9:30etan hasita, eta Alberto Catalan Parlamentuburua eta Helio Robleda, Kontuen Ganberako presidentea mintzatuko dira.

Ondoren auditoreak taldeka lanean hasiko dira, ondorengo gaiak aztertzeko: krisi garaiko fiskalizazioa, osasungintza eta irakaskuntzaren kontrola, toki erakundeen fiskalizazioa, auditoria-lanak hobetzeko neurriak eta txostenen eduki juridikoa.