Kontuen Ganberako presidentea Parlamentuko Toki Administrazio Batzordearen aitzinean agertuko da bihar, erakundeak plazaratu berri dituen zazpi txosten aukezteko. Helio Robledak aurkeztuko dituen txostenak honako udalei buruzkoak dira: Iruñea, Lizarra, Altsasu, Biana, Faltzes, Etxauri eta Berrioplano. Agerraldia arratsaldeko lauretan hasiko da.
Kontuen Ganberak Nafarroako udal nagusienetako idazkari eta kontu-hartzaileak bildu ditu, iazko fiskalizazioaz hitz egin eta urtekoa prestatzen hasteko. Jardunaldiaren barnean, hitzaldi bat antolatu da: Carlso Urgoiti Bilboko Udaleko Aurrekontu eta Zerbitzu Orokorretako zuzendariak Bilboko Udalak aurrekontu kudeaketak eginiko aldaketak aztertu ditu. Aipatzekoa da Bilboko Udalak iazko EPSA "European Public Service Awards" saria irabazi zuela, aurrekontu arloan eginiko aldaketei esker.
Nafarroako Comptos Ganbera lanean ari da kanpoko fiskalizazio erakundeen topaketaren antolaketan. Izena emateko epea amaiturik, aurreikuspenik hoberenak bete egin dira, 150 lagunek parte hartuko dutelako. Gehienak fiskalizazio erakundeetako teknikariak dira, baina badira, halaber, administrazioetako kudeatzaileak eta auditoria enpresetako ordezkariak. Topaketa intereseko gaiak aztertuko dituzten lan taldeen bitartez eginen da: krisi garaiko fiskalizazioa, hezkuntza eta osasungintzaren fiskalizazioa, azken urteotako esperientziarik aipagarrienak...
Gaur goizean, Nafarroako Parlamentuko Lehendakari berria, Alberto Catalán Higueras, Comptos Ganberara etorri da. Egoitza honetan bere Lehendakariarekin, Helio Robleda, eta beste teknikari batzuekin elkartu da.
Comptos Ganberak amaiera eman dio 2010-2011 ikasturteko bisitaldi-zikloari. Urritik hona 50 talde etorri dira gure egoitzara, batez ere ikasleak, kultur taldetakoak, unibertsitariak, jubilatuen elkartekoak…Guztira mila lagun inguruk ezagutu dute Antsoleaga karrikako egoitza.
Hurrengo ikasturtean Comptos Ganberaren egoitza ezagutu nahi duten guztiek zita har dezakete 848 421 400 telefonora deituta edo hurrengo helbide elektronikoan: mp.garcia.martinez@navarra.es
Nafarroako Comptos Ganberako presidenteak Unibertsitateen araubide juridikoari buruzko ikastaroan parte hartuko du gaur arratsaldean. Nafarroako Unibertsitatean egiten ari den ikastaroa atzo hasi zen eta bihar amaituko da. Helio Robledak unibertsitateen kanpo kontrola aztertuko du bere hitzaldian.
Ikastaroan aztertzen ari diren gaiak honakoak dira, besteak beste: etika, zuzenbidea eta ikerketa: ikerketaren kudeaketa; eta lan erreforma eta unibertsitatea. Eugenio Simon Acosta katedradunaren hitzaldiak amaiera emanen dio bihar ikastaroari.
Nafarroako Comptos Ganberak Audit Commissionekin antolaturiko lan-jardunaldia amaitu da. Guztira, hainbat erakundetako 50 teknikarik hartu dute parte. Audit Commissioneko ordezkariaren ondoren, Clara Muñoz, Daniel Carrasco eta Jose Luis Pablos unibertsitate-irakasleek kudeaketa-kostu eta adierazleak finkatzeko egiten ari diren lana aurkeztu dute.
Helio Robleda, Comptos Ganberako presidentea, eta Elizabeth Peers, Ingalaterrako Audit Commissioneko ordezkaria, kazetarien aitzinean agertu dira. Prentsaurrekoa bi erakundeen arteko harremanen berri emateko egin da. Izan ere, Comptos Ganberak gonbidaturik, Audito Commissioneko bi ordezkari Iruñera etorri dira, Ingalaterrako kontrol erakundeak eginiko lana azaltzeko. Audit Commission itzal handiko kontrol erakundea da, batez ere kontuen azterketa ez ezik, eraginkortasunaz ere iritzia ematen duela.
Nafarroako Comptos Ganberak aurten fiskalizatuko dituen udal guztietako idazkari eta kontu-hartzaileak erakundearen egoitzan elkartu dira gaur, egin beharreko lanaren berri jasotzeko. Halaber, Comptos Ganbera udalen kudeaketa sakonago aztertzeko martxan jarri nahi dituen adierazleen inguruko informazioa ere eman zaie. Helburua da fiskalizazio txostenenetan kontuak eta legezkotasuna ez ezik, eraginkortasuna ere aztertzea, eta horretarako adierazle komun batzuk behar dira. Oraingoz lau arlotan lan egin da: kirola, gizarte zerbitzuak, argiak eta haur eskolak.
Helio Robleda, Comptos Ganberako presidentea, Parlamentuko Ekonomia Batzordearen aitzinean agertu da gaur goizean, 2009ko kontu orokorrei buruzko txostena aurkezteko.
Robledak adierazi duenez, 2009ko gastuak 4.372 milioi izan ziren eta diru-sarrerak, berriz, 4.221 milioi. Urte amaierako zorra 1.024 milioikoa zen, aurreko urtean baino %26 gehiago.