ASOCEX
"Lizitazio publikoa eta lehia askea" gaiari buruzko jardunaldi bat antolatu du Kontuen Ganberak, CNMCrekin (Lehia eta Merkatuen Nazio Batzordea) eta Nafarroako Gobernuarekin elkar lanean. Lizitazio publikoa eta lehia askea loturik beharko lukete beti. Izan ere, lehia gutxitzeko eginiko iruzurrak diru publikoaren kudeaketa gardenaren aurkakoak dira eta, bestetik, kalte ekonomikoa eragiten diete administrazioei eta, beraz, biztanle guztiei. Bi hizlarik parte hartuko dute: Susana Campuzano, CNMCko Sustapen zuzendaria eta Sergio Sinovas, CNMCko alboko zuzendari-ordea.
Kontuen Ganberako patioan bilduriko jendeak gozatu egin zuen atzo "Hego Haizeak" taldearen musikarekin. Aitor Urquizak, Arkaitz Ibarrak, Asier Agirrek eta Xabier Olazabalek osaturiko taldeak txistuaren doinu klasikoak eskaintzeaz gain, Irlandako doinuak ere jo zituen eta, amaitzeko, Sanferminetako musika alaia. "Hego Haizeak" taldearena da Kontuen Ganberak ekainean antolaturiko bigarren eta azken emandaldia. Jendearen erantzuna ikusita, heldu den urtean ere kultur ekimenek tokia izanen dute Ansoleaga karrikako egoitzan.
Javier Eneriz Arartekoak, etzi, ekainak 10, Kontuen Ganberaren topaketetan parte hartuko du. Ekimenaren helburua da Nafarroako erakunde, gizarte eta kultur arloetako pertsonaiak Kontuen Ganberaren egoitzara eramatea, kontrol erakundeko teknikariek ezagutu ditzaten. Ohi denez, Javier Enerizi elkarrizketa egiten zaio eta ondoren galderak egiteko aukera izanen da.
Asun Olaetxea izanen da, ezusterik ezean, Helio Robledaren ordezko Kontuen Ganberako lehendakaritzan. Gobernuari babesa ematen dioten taldeek gaur goizean aurkeztu dute Parlamentuan beteluarraren hautagaitza.
Olaetxea Enpresen Administrazio eta Zuzendaritzan lizentziaduna da (NUP, 2000). Zuzendaritza eta Kudeaketa Publikoari buruzko masterra egina du (NUP, 2010), eta baita Toki Ogasunaz eta Kontu-ikuskaritza finantziarioz bana urteko ikastaroak, NUPn eta UNEDen eginak.
Estatuko kontu epaitegietako ordezkariak Iruñean elkartuko dira gaur, toki administraziorako ikuskaritzetan kontuan hartu beharreko arauak aztertzeko. Bileraren helburua da udal eta gainerako toki administrazioei egiten zaizkien fiskalizazioak berdintsuak izan daitezkeela. Bileran Espainiako Kontuen Epaitegiko ordezkariak eta lurraldeetakoak izanen dira.
Rafael Gonzalez saxo-jotzaileak eta Pablo Llamas piano-jotzaileak kontzertu bat emanen dute bihar, apirilak 24, Kontuen Ganberaren egoitzan. Kontzertua Nafarroako Kutxaren Fundazioak diruz-lagunduko "Acciones informales" proiektuaren barruan egiten da. Bi musikarik Iruñeko Kontserbatorioan ezagutu zuten elkar, eta geroztik jazz musika lantzen dute, biek eginiko doinuak eta klasikoak. Emanaldia arratsaldeko 7:30etan hasiko da eta sarrera librea da lekua bete arte.
Antonio Minguillonek "Administrazio elektorinikoa eta auditoria informatikoa" gairi buruzko hitzaldia eman du gaur gure egoitzan.Minguillon Balentziako Kontuen Ganberako auditorea da, esperientzia handikoa, eta aditua da auditoria informatikoan. Arlo horretan diru publikoaren kontrolak dituen erronkak aztertu ditu.
Kontuen Ganbera lanean ari da Nafarroako Kutxaren kontuei buruzko txostena heldu den astean aurkezteko. Kutxaren desagerpena aztertzen ari den batzordeak 2000-2012 epeko kontuak aztertzeko eskatu zion Kontuen Ganberari. Funts pribatuak izanik, kontu horien auditoria kontu-ikuskari pribatu batek egina du. Kontuen Ganberaren helburua da kontuen azterketan parlamentarioi laguntzea. Horretarako, Kutxaren kontusail nagusien bilakaera aztertuko ditu. Txostena martxoaren 13an aurkeztuko dio aipaturiko batzordeari.
Heldu den ostegunean, Kontuen Ganberako presidentea Parlamentuan agertuko da Tasunbinsa eta Anfas-ek jasotako diru-laguntzei buruzko txostena aurkezteko. Bildu-Nafarroa taldeak eskatutako txostenak bi entitateek 2009-2013 epean jasotako laguntzak aztertu ditu. Iazko azaroaren amaieran argitaratu zen.
Helio Robledak gaur Parlamentuan egitekoa zuen agerraldia otsailaren 2ra atzeratu da, Parlamentuak berak eskatuta. Agerraldiaren helburua zen foru Administrazioaren eraikinetako garbiketa kontratuari buruzko txostena aztertzea. Ez da datozen egunetan izanen dugun agerraldi bakarra. Nafarroako Orkestra Sinfonikoari buruzko txostena ere aztergai izanen da Parlamentuan, otsailaren bigarren astean.